သတိပြုအပ်သော အနော်ရထာ ကျွဲခတ်ကိန်း

ပွင့်လင်းရာသီ ရောက်လာပြီဆိုသည်နှင့် အပျော်ဖြစ်စေ၊ အပန်းဖြေ ဖြစ်စေ၊ အလုပ်ကိစ္စနှင့် ဖြစ်စေ ခရီးထွက်ရန် စီစဉ်သူ များလာကြသည်။ ခရီးကိစ္စ များလာချိန် ဖြစ်၍ မိမိတို့ သွားလာသော အရပ်ဒေသသည် ဘေးရန် ကင်း၊ မကင်း မိမိနှင့် သင့်၊ မသင့်ကို တွက်ဆရန် လိုလာသည်။

ရှေးခေတ်အခါက အနော်ရထာမင်းကြီး မသွားသင့်သော အရပ်ဒေသသို့ သွားရောက်ခြင်းကြောင့် ကျွဲခတ်၍ ကံတော်ကုန်ခဲ့သည်ကို အနော်ရထာကျွဲခတ်ကိန်းအဖြစ် မြန်မာ့ရိုးရာဗေဒင်ပညာတွင် ပမာပြုထားသည်။

အဆိုပါကိန်းခန်းအရ ရောက်ဆဲအသက်အလိုက် ခရီးသွားရာတွင် သတိပြုသင့်သော အရပ်ဒေသကို ကိုယ်တိုင် တွက်စစ်သတိပြုနိုင်ရန် ဖော်ပြပေးပါမည်။

မိမိရောက်ဆဲအသက်မှန်ကိုသိရုံဖြင့် မသွားသင့်သောအရပ်ဒေသကို အလွယ်တကူ တွက်ယူနိုင်ပါသည်။ အသက်မှန် ဟုဆိုရာတွင် ဥပမာ ၃၀ နှစ်ပြည့်ပြီးပါက ၃၁ နှစ် ယူရပါမည်။ အကယ်၍ ၃၁ နှစ်ပြည့်ပြီးသူဆိုက ၃၂ နှစ် ယူရပါမည်။ ပြည့်ပြီးသောအသက်ထက် တစ်နှစ်တိုးယူခြင်းကို ဗေဒင်ပညာအရ အသက်မှန်ဟု ခေါ်ဆိုပေသည်။

အသက်မှန်ကိုသိပါက တွက်စစ်နိုင်ပါပြီ။ မိမိအသက်မှန်ကို ၂ နှင့် ပေါင်းလိုက်ပါ။ ထို့နောက် ၈ နှင့်စားပြီး အကြွင်းအလိုက် အရပ်ဒေသသို့ ခရီးသွားခြင်း ရှောင်ကြဉ်သင့်ပေသည်။

အကြွင်း(၁) – အရှေ့အရပ်

အကြွင်း (၂) – အနောက်မြောက်အရပ်

အကြွင်း (၃) – အနောက်အရပ်

အကြွင်း (၄) – မြောက်အရပ်

အကြွင်း (၅) – အရှေ့မြောက်အရပ်

အကြွင်း (၆) – အရှေ့တောင်အရပ်

အကြွင်း (၇) – တောင်အရပ်

အကြွင်း (ဝ) – အနောက်တောင်အရပ်

အထက်ပါအကြွင်းအလိုက် အရပ်ဒေသသို့ ရောက်ဆဲအသက်ပိုင်းများတွင် ခရီးသွားခြင်း မပြုသင့်ပါ။

ဥပမာ – အသက် ၄၀ နှစ်ထဲ ရောက်နေသူဆိုပါက အသက်တွင် (၂) ပေါင်းထည့်လျှင် ၄၂ ရပါမည်။ ၎င်းကို ၈ ဖြင့် စားပါက ၂ – ကြွင်းပါမည်။ သို့ဖြစ်၍ အနောက်မြောက်အရပ်သို့ ခရီးသွားလာခြင်းမှ ရှောင်ကျဉ်အပ်ပါသည်။

အကယ်၍ မိမိသည် အဆိုပါအရပ်ဒေသသို့ မဖြစ်မနေ ခရီးသွားရမည်ဆိုပါက ခရီးမသွားမီ မိမိမွေးနံထောင့်တွင် ဖယောင်းတိုင်အနီ ၁၂ တိုင် လှူပြီး ဘုရားရုပ်ပွားတော်ကို ရေသက်စေ့သပ္ပါယ်ပါ။

ပြီးလျှင် သမ္ဗုဒ္ဓေဂါထာတော်ကြီးကို သက်စေ့ရွတ်ဖတ်ပူဇော် ဆုတောင်းပြီးမှ သွားပါ။ လမ်းခရီးတစ်လျောက်တွင်လည်း သမ္ဗုဒ္ဓေဂါထာတော်ကြီးကို တတ်အားသရွေ့ ရွတ်ဖတ်ပူဇော်သွားပါ။ သို့မှသာ ဘေးကင်းရန်ကင်းပါလိမ့်မည်။

အနော်ရထာကျွဲခတ်ကိန်းဟူသော မြန်မာ့ရိုးရာဗေဒင်ပညာခန်းတစ်ခုကို လက်တွေ့အသုံးချ တွက်စစ်ခြင်းဖြင့် ဘေးအန္တရာယ် ကင်းရှင်းစွာ လိုရာခရီး ရောက်နိုင်ကြပါစေသော်…။

ကိုယ်စိတ်နှစ်ပါးချမ်းမြေ့ပါစေ – ဆရာလင်းဝေအောင် (မြန်မာ့ဆန်းကျမ်းဗေဒင်နှင့် ကေပီရှေ့ဆောင်နက္ခတ်ပညာရှင်)

(ဗေဒင်သုတ၏ မူပိုင်ဆောင်းပါး ဖြစ်သည်။ အခြားသော Social Media Platform များ နှင့် Website များတွင် ပြန်လည်ကူးယူဖော်ပြခြင်းကို ခွင့်မပြုပါ။ ဖတ်ရှုအားပေးမှုအတွက် ကျေးဇူးတင်ပါသည်)