လူတိုင်းအတွက် ရောက်ဆဲအသက်ပိုင်းအလိုက် တစ်နှစ်တာ ကံဇာတာ အကောင်း၊ အဆိုးအခြေအနေများကို အလွယ်တကူ ကိုယ်တိုင် တွက်ချက်သိရှိနိုင်သည့် မြန်မာ့လက်ဆန်းဗေဒင်ကိန်းတစ်ခုကို အများအကျိုးငှာ ဖော်ပြလိုက်ပါသည်။
တွက်နည်းမှာ အလွန် လွယ်ကူပါသည်။ ရောက်ဆဲအသက်ကို တည်ပါ။ နေ့ခုနှစ်နေ့၊ ခုနှစ်နံ ရှိသောကြောင့် (၇) ဖြင့် စားပါ။ ရလာသော အကြွင်းအလိုက် တစ်နှစ်စာအဟောကို ဖတ်ရှု အသုံးချရန်သာ ဖြစ်ပါသည်။
ဥပမာ အသက် ၂၈ နှစ် ပြည့်ပြီးသူတစ်ဦးသည် ၂၉ နှစ်ထဲသို့ ဝင်နေပြီဖြစ်၍ ၎င်း၏ ရောက်ဆဲအသက်အမှန်မှာ (၂၉) နှစ် ဖြစ်သည်။ သို့ဖြစ်၍ အသက် ၂၉ နှစ်ကို (၇) ဖြင့် စားပါက (၁) ကြွင်း ပါမည်။ (၁) ကြွင်း အဟောမှာ ရောက်ဆဲအသက် ၂၉ နှစ်အတွက် တစ်နှစ်စာ ဖြစ်ပါသည်။
(၁) ကြွင်း အဟော
မိတ်ဆွေအသိုင်းအဝိုင်းထံမှ အကူအညီကောင်းများ ရတတ်သည်။ ခရီးကောင်းများ သွားလာရကိန်း ရှိနေသည်။ အလုပ် မရေရာခြင်း၊ အကြံအစည် ပျက်ခြင်းတို့ ဖြစ်တတ်သည်။ ပူပန်သောက များမည်။ စက်ပစ္စည်းများ ထွက်၊ ပျက်တတ်သည်။ ထိခိုက်ရှနာ၊ ခွဲစိတ်ကုသမှု ဖြစ်တတ်သည်။ ပညာရေး၊ သင်ကြားရေးကိစ္စများ အောင်မြင်မည်။
(၂) ကြွင်း အဟော
ဇိမ်ခံပစ္စည်း၊ အသုံးအဆောင်များ ဝင်လာတတ်သည်။ ခရီးကောင်းများ သွားလာရတတ်သည်။ နိုင်ငံရပ်ခြားကံပါ ပေါ်တတ်သည်။ ထီသော်လည်းကောင်း ပေါက်တတ်သည်။ အိုးအိမ်၊ အလုပ်ကိစ္စ အပြောင်းအလဲ ဖြစ်တတ်သည်။ သားသမီးအပူ များမည်။ ပညာရေး အနှောင့်အယှက် ရှိမည်။ သူတပါးကြားထဲ ဝင်မပါမိစေရန် သတိပြုရမည်။
(၃) ကြွင်း အဟော
နာမည်ဂုဏ်သတင်း တက်မည်။ လုပ်ငန်းစီးပွား တိုးတက်အောင်မြင်တတ်သည်။ လူကြီးများက ကူညီမစမည်။ ပြည်ပခရီး အောင်မြင်ကိန်း ရှိသည်။ ငွေကြေးလာဘ်လာဘ ဝင်လွယ်မည်။ အဆက်အသွယ်ကောင်း ရရှိမည်။ ငွေဝင်ပြီး အဖတ်မတင် ဖြစ်မည်။ ခရီးကိစ္စ အဆင်မပြေ ဖြစ်တတ်သည်။ မိတ်ပျက်ဆွေပျက် ဖြစ်တတ်သည်။
(၄) ကြွင်း အဟော
အစိုးရ၊ အာဏာပိုင်နှင့် ဆက်စပ်ကိစ္စများ ထူးကဲစွာ အဆင်ပြေမည်။ ရာထူတိုး၊ မျက်နှာကောင်းရကိန်း ရှိသည်။ မိတ်ကောင်းဆွေကောင်း မစမည်။ ငွေအလုံးအရင်းနှင့် ဝင်တတ်သည်။ အလှူ ပေးရတတ်သည်။ ပေးဖြစ်လျှင် ပိုကောင်းမည်။ အိမ်ထောင်ရေးတော့ အညံ့ ရှိနိုင်သည်။ ခရီးကိစ္စ စိတ်ညစ်ရမည်။ အတိုက်အခိုက် များမည်။
(၅) ကြွင်း အဟော
ကျား၊ မ မရွေး မေတ္တာရေးကိစ္စများ ထင်ရှားပေါ်လွင်လာတတ်သည်။ ခရီးကောင်းများ သွားလာရတတ်သည်။ ငွေလည်း ခါတိုင်းထက် အဝင် များလာနိုင်ပြီး ယာဉ်၊ ကားကိစ္စ အကျိုးပေးတတ်သည်။ သားရေးသမီးရေးကိစ္စ ပူပန်ရတတ်သည်။ အမှုအခင်းသော်လည်းကောင်း ဖြစ်တတ်သည်။ မီး၊ လျှပ်စစ်နှင့်ပတ်သက်၍ သတိထားပါ။
(၆) ကြွင်း အဟော
ကြားခံအကျိုးဆောင်အလုပ်များ အောင်မြင်တတ်သည်။ အဆက်အသွယ်ကောင်းများ ပေါ်မည်။ လာဘ်လာဘ ဝင်လွယ်မည်။ နိုင်ငံရပ်ခြားကံပေါ်တတ်သည်။ စက်ပစ္စည်းကောင်းများ ဝင်တတ်သည်။ ငွေဝင်တတ်သော်လည်း စိတ်ညစ်ပြီးမှ ရတတ်သည်။ ပညာရေးတွင် အခက်အခဲ များမည်။ အလုပ်ပြောင်း၊ အိမ်ပြောင်း ဖြစ်တတ်သည်။
(ဝ) ကြွင်း အဟော
မိတ်ဆွေ၊ အဆက်အသွယ်များ အကျိုးပေးမည်။ သတင်းကောင်းများ ကြားသိရတတ်သည်။ လာဘ်လာဘများ ဝင်လွယ်မည်။ အလုပ် တိုးချဲ့ခြင်း၊ အသစ် စတင်ခြင်း ကောင်းသည်။ အမွေ ရတတ်သည်။ ငွေရေးကြေးရေးတွင် အဖတ်မတင် ဖြစ်မည်။ ဆွေမျိုးသားချင်း ဒုက္ခပေးတတ်သည်။ ငွေပျောက်၊ ပစ္စည်းပျောက် ဖြစ်ပွားတတ်သည်။
ဖော်ပြပါ တစ်နှစ်စာ အဟောများသည် နေ့နံ မရွေး၊ လူတိုင်း အလွယ်တွက်ကြည့်နိုင်သော သက်ရောက်ဗေဒင် နည်းတစ်နည်းသာ ဖြစ်ပြီး မိမိတို့ ကံကြမ္မာကို မိမိတို့ ကိုယ်တိုင် အကြမ်းဖျင်း သိရှိနိုင်ရန်အတွက် ရည်ရွယ်၍ တင်ပြပေးခြင်း ဖြစ်ပါသည်။
နေ့နံအားလုံး ကံကောင်းကြပါစေ
ဧက (ဗေဒင်သုတ)
(ေဗဒင္သုတ၏ မူပိုင္ေဆာင္းပါး ျဖစ္သည္။ အျခားေသာ Social Media Platform မ်ား ႏွင့္ Website မ်ားတြင္ ျပန္လည္ကူးယူေဖာ္ျပျခင္းကုိ ခြင့္မျပဳပါ။ ဖတ္ရႈအားေပးမႈအတြက္ ေက်းဇူးတင္ပါသည္)